مراحل تطور الطفل في السنة الأولى: شنو المفروض يسوي بكل عمر؟
من أكثر الأسئلة اللي يسألها الأهل بالعيادة:«دكتور، طفلي تطوره طبيعي؟ بهذا العمر شنو المفروض يسوي؟»
الحقيقة أن تطور الأطفال مو سباق، وممكن طفل يكتسب مهارة قبل طفل آخر بفترة بسيطة. لكن أكو محطات تطورية مهمة (Developmental Milestones) نتابعها حتى نطمئن أن تطور الطفل الحركي، اللغوي والاجتماعي ماشي بصورة مناسبة.
من الولادة إلى عمر شهرين
خلال الأسابيع الأولى يبدأ الطفل بالتدريج يتفاعل أكثر ويا العالم المحيط بيه.
ممكن نلاحظ أنه:
ينظر إلى وجه الأم أو الأب.
يهدأ عند حمله أو التحدث وياه.
يبدأ بالابتسام الاجتماعي.
ينتبه للأصوات العالية.
يحرك إيديه ورجليه بصورة جيدة.
يرفع رأسه لفترة قصيرة وهو على بطنه.
بهذا العمر، التواصل المباشر ويا الطفل مهم جداً. احچوا وياه، ابتسموا له وخلوه يشوف وجوهكم.
بعمر 4 أشهر
هنا يبدي التفاعل يصير أوضح.
غالباً الطفل:
يبتسم حتى يجذب انتباه الأهل.
يصدر أصوات مثل «آآ» و«أوو».
يلتفت باتجاه صوتكم.
يثبت رأسه بصورة أفضل.
يمسك الأشياء إذا وضعت بيده.
يرفع رأسه وصدره عندما يكون على بطنه.
ومن المفيد إعطاء الطفل Tummy Time وهو صاحي وتحت مراقبة شخص بالغ.
بعمر 6 أشهر
بهذا العمر تبدي مرحلة جميلة من الاستكشاف.
ممكن الطفل:
يعرف الأشخاص المألوفين.
يضحك ويتفاعل وياكم.
يصدر أصوات متعددة ويحاول يبادل الأصوات.
يمد إيده حتى يأخذ لعبة.
يحط الأشياء بفمه لاستكشافها.
يتقلب من البطن إلى الظهر.
يسند نفسه بإيديه أثناء الجلوس.
وبحدود هذا العمر يبدأ معظم الأطفال إدخال الطعام التكميلي عندما يكون الطفل مستعداً، مع استمرار الرضاعة الطبيعية أو الحليب المناسب لعمره.
بعمر 9 أشهر
هنا الحركة والتفاعل الاجتماعي يصيرون أكثر وضوحاً.
قد تلاحظون أن الطفل:
ينظر عندما تنادونه باسمه.
يتفاعل ويا لعبة «الغميضة».
يصدر أصوات متكررة مثل «ماماما» أو «بابابا».
ينقل الأشياء من إيد إلى الثانية.
يجلس بدون مساعدة.
يحاول الوصول للألعاب البعيدة.
قد يبدأ بالحبو أو محاولات الحركة بطرق مختلفة.
ملاحظة: مو كل الأطفال يحْبون بنفس الطريقة، وبعض الأطفال ممكن يتجاوزون مرحلة الحبو، لذلك الحبو وحده مو معيار كافي للحكم على التطور.
بعمر سنة
وصلنا لأول عيد ميلاد 🎂 وهنا نتوقع تطوراً واضحاً بالتواصل والحركة.
غالباً الطفل:
يلعب ألعاب بسيطة ويا الأهل.
يلوّح «باي باي».
يفهم كلمة «لا».
ينادي «ماما» أو «بابا» أو يستخدم كلمة ذات معنى.
يبحث عن الشيء اللي يشوفكم تخفوه.
يسحب نفسه للوقوف.
يمشي وهو متمسك بالأثاث.
بعض الأطفال يأخذون خطوات مستقلة، بينما يحتاج آخرون وقتاً إضافياً.
هل لازم كل طفل يحقق المهارات بنفس الوقت؟
لا.
هناك اختلاف طبيعي بين طفل وآخر، لذلك ما نحكم على تطور الطفل اعتماداً على مهارة واحدة فقط. الطبيب ينظر إلى الصورة كاملة: الحركة، اللغة والتواصل، التفاعل الاجتماعي، السمع والبصر وبقية جوانب النمو والتطور.
متى يحتاج الطفل مراجعة الطبيب؟
المراجعة مهمة إذا لاحظ الأهل أن الطفل:
فقد مهارة كان يعرف يسويها سابقاً.
لا يتفاعل مع الأشخاص أو الأصوات بصورة متوقعة.
عنده تأخر واضح باكتساب أكثر من مهارة.
عنده اختلاف واضح بالحركة بين جهتي الجسم.
أو إذا كان عندكم أي قلق بخصوص تطوره حتى لو ما تعرفون تحددون السبب.
فقدان المهارات المكتسبة خصوصاً يحتاج تقييم طبي وما ننصح بانتظار الطفل حتى «يلحق وحده».
شنو نكدر نسوي حتى نساعد تطور الطفل؟
أفضل شيء مو شراء ألعاب غالية، وإنما التفاعل اليومي.
احچوا ويا طفلكم، اقرأوا له، العبوا وياه، خلوه يتحرك ويستكشف ضمن بيئة آمنة وقللوا قدر الإمكان من اعتماده على الشاشات كبديل عن اللعب والتواصل المباشر.
وأخيراً، تذكروا:كل طفل إله سرعته الخاصة، لكن المتابعة المنتظمة للتطور تساعدنا نكتشف أي تأخر بصورة مبكرة ونتدخل بالوقت المناسب.
د. علي داود العامرياختصاص طب الأطفال وحديثي الولادة
تعليقات