الاسترجاع عند حديثي الولادة: شنو الطبيعي ومتى نقلق؟
الاسترجاع عند حديثي الولادة: شنو الطبيعي ومتى نقلق؟
من أكثر الأشياء اللي تقلق الأهل بأول أشهر من عمر الطفل هي الاسترجاع بعد الرضاعة. الطفل يرضع، وبعدها بدقائق يرجّع شوية حليب من فمه، والأهل مباشرة يسألون: الحليب ما ناسبه؟ عنده مشكلة بالمعدة؟ لازم نغير نوع الحليب؟
بالحقيقة، الاسترجاع شائع جدًا عند حديثي الولادة والرضع، وغالبًا يكون طبيعي وما يحتاج علاج.
ليش الطفل يسترجع الحليب؟
بأول أشهر من العمر، العضلة الموجودة بين المريء والمعدة بعد ما تكون ناضجة بشكل كامل، ولهذا ممكن يرجع جزء بسيط من الحليب من المعدة للمريء ويطلع من فم الطفل.
ويصير الاسترجاع أكثر إذا الطفل:
رضع كمية أكبر من حاجته.
رضع بسرعة.
بلع هوا أثناء الرضاعة.
تحرك هواي مباشرة بعد الرضعة.
صار ضغط على بطنه بعد الرضاعة.
لهذا مو كل استرجاع يعني أكو مرض، ومو معناها مباشرة لازم نغير نوع الحليب.
شلون أعرف أن الاسترجاع طبيعي؟
ركز على الطفل أكثر من كمية الحليب اللي رجعها.
إذا طفلك:
يرضع زين، مرتاح أغلب الوقت، وزنه ديصعد بصورة طبيعية، وما عنده صعوبة بالتنفس أو البلع، والاسترجاع عبارة عن كمية بسيطة من الحليب بدون قوة شديدة…
فغالبًا هذا استرجاع طبيعي.
ومع نمو الطفل ونضوج الجهاز الهضمي، عادةً يبدأ يقل تدريجيًا، ويختفي عند أغلب الأطفال خلال السنة الأولى من العمر.
شنو أسوي حتى أقلل الاسترجاع؟
أول شي، لا تطي الطفل كمية حليب أكبر من حاجته. الإفراط بالرضاعة من الأسباب المهمة اللي تزيد الاسترجاع.
حاول تخلي الطفل يتجشأ أثناء وبعد الرضاعة، خصوصًا إذا كان يرضع بالحليب الصناعي.
وبعد الرضعة، شيله بوضعية مستقيمة على صدرك تقريبًا 20–30 دقيقة، وتجنب اللعب وياه أو تحريكه بقوة مباشرة بعد الأكل.
وكذلك لا تخلي الحفاض أو الملابس ضيقة بصورة تضغط على بطنه.
أرفع مخدة الطفل حتى ما يسترجع؟
لا.
حتى لو طفلك يسترجع، وقت النوم نخليه على ظهره، على سطح ثابت ومستوي وبدون مخدة.
لا نخليه ينام على بطنه أو جنبه حتى نمنع الاسترجاع، ولا نرفع رأسه بالمخدات أو المناشف.
هل الاسترجاع يحتاج علاج؟
إذا الطفل مرتاح، يرضع زين ووزنه ديصعد بصورة طبيعية، فغالبًا ما يحتاج دواء.
وأدوية الحموضة مو علاج لكل طفل يسترجع، لذلك لا تستخدم أي علاج من نفسك بدون تقييم طبي.
وكذلك لا تغير نوع الحليب كل يومين بسبب الاسترجاع فقط؛ لأن المشكلة بكثير من الأحيان مو من نوع الحليب أصلًا.
متى الاسترجاع يحتاج مراجعة طبيب؟
هنا لازم ننتبه.
راجع طبيب الأطفال إذا الطفل:
وزنه ما ديصعد أو بدأ ينزل.
يرفض الرضاعة بشكل مستمر.
يبچي ويتألم بشكل واضح أثناء أو بعد الرضاعة.
عنده صعوبة بالبلع.
القيء قوي وقذفي ومتكرر.
القيء لونه أخضر.
أكو دم بالقيء.
بطنه منتفخ بشكل واضح.
عنده خمول أو علامات جفاف.
عنده مشاكل بالتنفس أو اختناق متكرر أثناء الرضاعة.
خصوصًا القيء الأخضر عند حديث الولادة ما نعتبره استرجاع طبيعي ويحتاج تقييم طبي عاجل.
وكذلك إذا الطفل الصغير عنده قيء قذفي قوي ومتكرر بعد الرضعات، لازم ينفحص حتى نستبعد أسباب مرضية مثل تضيق مخرج المعدة.
الخلاصة
إذا طفلك يسترجع شوية حليب بعد الرضاعة، لكن يرضع زين، مرتاح ووزنه ديصعد، فغالبًا الموضوع طبيعي وما يحتاج خوف ولا تبديل مستمر للحليب ولا أدوية.
نظم كمية الرضعة، خليه يتجشأ، واحمله بوضعية مستقيمة فترة قصيرة بعد الرضاعة.
أما إذا الاسترجاع صار قوي، أو أخضر، أو بيه دم، أو أثر على رضاعة الطفل ووزنه، هنا لازم نراجع طبيب الأطفال.
د. علي داود العامري
اختصاص طب الأطفال وحديثي الولادة
تعليقات